कफी खेतीलाई राम्रोसँग विस्तार गर्नसके मुलुक आर्थिक रुपमै बलियो हुन सक्ने कफि विज्ञहरुकाे सुझाव

काठमाडौं ।। २०३३ सालमा सरकारले भारतबाट अराविका जातको कफिको विउ ल्याएपछि गुल्मीमा व्यावसायिक कफी खेती सुरु भएको मानिन्छ । कफी खेतीका लागि नेपाल ऊर्वर भूमी भएपनि ४३ वर्ष बित्दा पनि आवश्यक पर्नेजति कफीको खेती र उत्पादन भएको छैन । कफी खेतीको विस्तार नहुँदा हरेक वर्ष सयौँ टन आयात हुने गरेको छ । कफी खेतीका लागि मुलुकका ४० जिल्ला उपयुक्त छन् । तर नुवाकोट, गुल्मी, सिन्धुपाल्चोक, काभ्रेलगायतका १२ जिल्लामा मात्रै अहिले व्यावसायिक रुपमा कफी खेती भइरहेको छ । तुसारो नपर्ने र पारिलो घाम लाग्ने जमिनमा कफी खेति गर्न सकिने राष्ट्रिय फलफूल विकास केन्द्रका कृषि प्रसार अधिकृत शरद पाण्डेको भनाइ छ । खेतीयोग्य सबै जमिनमा कफी नलगाइँदा गतवर्ष मात्रै विदेशबाट १ सय ६३ मेट्रिकटन कफी आयात भएको तथ्यांक छ । यो वर्ष भने ११ सय मेट्रिकटन भन्दा बढी कफी आयात भएको राष्ट्रिय चिया तथा कफी विकास बोर्डले जनाएको छ । कफी खेती गर्न चाहाने किसानहरुको लागि बोर्डले सहयोग गर्ने बोर्डका निमित्त कार्यकारी निर्देशक दिपक खनालले बताउनुभयो । अहिले दुई हजार ६ सय ५० हेक्टर जमिनमा मात्रै भएको खेतीबाट ८४ हजारभन्दा धेरै किलो कफी निर्यात हुँदा नौ करोड ३७ हजार २५ रुपैयाँ आम्दानी भएको छ । कफी खेतीलाई राम्रोसँग विस्तार गर्नसके मुलुक आर्थिक रुपमै बलियो हुन सक्ने कफि विज्ञहरु बताउँछन् । नेपालले अहिले पाँचसय मेट्रिकटनको हाराहारीमा कफि उत्पादन गरिरहेको छ । तर जापान, कोरिया, जर्मनी लगायतका देशबाट ८ हजार मेट्रिक टन कफी माग भइरहेको छ । नेपाललाई आन्तरिक रुपमै पनि ७ देखि ८ हजार मेट्रिक टन कफि आवश्यक पर्ने गरेको छ ।