नेकपाले सभामुखको उम्मेदवार चयन गर्न ढिलाइ गर्दा प्रतिनिधिसभाको बैठक प्रभावित हुँदै

काठमाडौं ।। नेकपाले सभामुखको उम्मेदवार चयन गर्न ढिलाइ गर्दा प्रतिनिधिसभाको बैठक प्रभावित हुँदै आएको छ । पुस ११ गतेका लागि बोलाईएको प्रतिनिधिसभा बैठक सूचना टाँसेर पुस १६ गतेका लागि सारिएको थियो । १६ गतेको बैठक पनि बस्दै नबसी २७ गते भोली (आईतबार) लागि सारिएको छ । सभामुखको उम्मेदवार कसलाई बनाउने भन्नेमा नेकपाका अध्यक्षद्धय केपी शर्मा ओली र पुष्प कमल दाहाल (प्रचण्ड) बीचमा कुरा नमिल्दा प्रतिनिधिसभाको बैठक प्रभावित हुँदै आएको हो । पार्टी एकीकरण पछिको सहमति अनुसार प्रधानमन्त्री पूर्व एमाले र सभामुख पूर्व माओवादीको भागमा परेको थियो । पूर्व माओवादीका नेताहरुले फेरि पनि त्यही समिकरण नभत्कने गरि सभामुख आफ्नो पक्षले पाउनुपर्ने दवाव अध्यक्ष प्रचण्डलाइ दिइरहेका छन् । तर अर्का अध्यक्ष ओली अब एउटै पार्टी भएकाले त्यो भागबण्डा मान्न तयार नदेखिंदा झनै समस्या भएको छ । दुईजना अध्यक्षले टुंग्याउने चलन भएकाले यो विषयलाई छिट्टै टुंग्याउनुपर्ने नेकपाका संसदीय दलका उपनेता सुवास नेम्वाङको भनाइ छ । पूर्व माओवादीको तर्फबाट अग्नि सापकोटा, देव गुरुङ, टोपबहादुर रायमाझी, पम्फा भूसालको नाम चर्चामा छ । पूर्व एमालेको तर्फबाट सुवासचन्द्र नेम्वाङ तथा हालका उपसभामुख शिबमाया तुम्बाहाङ्फे दौडमा देखिनुभएको छ । प्रधानमन्त्री ओली सकेसम्म नेम्वाङ्लाई नै सभामुख बनाउने चाहानामा देखिनुभएको छ । राष्ट्रपति अहिलेका उपसभामुखको पक्षमा वकालत गरिरहनु भएको छ । सभामुखका लागि व्यक्ति ताना–तानमा प्रतिनिधिसभाको सभामूख चयन प्रक्रिया नै लम्बिएको छ । दलहरुको तर्फबाट आकस्मिक आग्रह नआएमा अहिलेसम्म सचिवालय बैठक चलाउने तयारीमा छ । भोली दिउँसो १ बजेका लागि बोलाईएको बैठकको सम्भावित कार्यसूची तयार पारिएको संसद सचिवालयका सहायक प्रवक्ता दशरथ धमलाले बताउनुभयो । संसद सचिवालयले तयार पारेको कार्यसूचीमा प्रधानमन्त्री ओलीले राष्ट्रिय प्राकृतिक स्रोत तथा वित्त आयोगको प्रतिवेद २०७६ पेश गर्ने, भौतिक पूर्वाधार तथा यातायात मन्त्री वसन्तकुमार नेम्वाङले रेल विधेयक र उद्योग वाणिज्य तथा आपूर्ति मन्त्री लेखराज भट्टले पनि एउटा विधेयक पेश गर्नुहुनेछ । नेकपामा सहमति भएन र उपसभामुखले राजीनामा दिनुभएन भने सभामुखको चयन प्रक्रिया झनै पर पुग्ने देखिएको छ ।