कपिलवस्तु ।। कपिलवस्तुको बिजयनगर गाउँपालिकाको भारतको सीमा क्षेत्रमा पर्ने सीमा स्तम्भहरुको अवस्था अहिले जिर्ण बनेको छ । देशैभर सीमा विवाद भइरहेको बेला तीन महिनाअघि आएको बाढीले ढालेको सीमा स्तम्भको अझै संरक्षण हुन सकेको छैन ।
गाउँपालिकाको वडा नम्बर ५ र ६ मा रहेका २ खोलामा ५ सीमा स्तम्भ ढालेको थियो । दैनिकजसो सीमा क्षेत्रमा पुग्ने नेपाल प्रहरीले निरिक्षणगरी फर्कन वाहेक अन्य काम गरेको छैन । वर्षाको भेलले सीमा स्तम्भ लडाएसँगै शसस्त्र प्रहरी बल र नेपाल प्रहरीले सीमा स्तम्भको निगरानी गर्दै आएको छ । सीमास्तम्भ निर्माणका लागि दुई देशकै टोली आवश्यक पर्ने भएकाले सोको लागि केन्द्रीय स्तरकै पहल आवश्यक भएको स्थानीय सरकारको भनाइ छ ।
विजयनगर गाउँपालिका ५ का वडा अध्यक्ष अनवर मुसलमानले पटक पटक निरिक्षण गर्न गएको भएपनि कुनै कदम भने चाल्न नसकेको बताउनुभयो । सीमास्तम्भ निर्माणका लागि नेपाल र भारतका दुईदेशीय केन्द्रियस्तरको सर्वेक्षक सहितको प्राविधिक टोलीले मात्र संरक्षण गर्न सक्ने भएकाले सीमा स्तम्भ संरक्षणमा ढिलाई भएको हो ।
शसस्त्र प्रहरी गुल्म कृष्णनगर क्षेत्रमा मात्र २ सय ८९ सीमास्तम्भ रहेका छन् । जसमा एउटा जङ्गे पिल्लर रहेको छ भने त्यो पनि जिर्ण हुँदा समस्या छ । केहि स्तम्भहरु नयाँ बनेका छन् भने केहि पुराना र जिर्ण छन् ।
