रौतहट ।। करदाता सेवा कार्यालय हटाउने सरकारी निर्णयको विरोधमा आजदेखि रौतहट उद्योग वाणिज्य संघले गौरस्थित करदाता सेवा कार्यालयको मूल गेटमै धर्ना कार्यक्रम सुरु गरेको छ ।
संघले करदाता सेवा कार्यालय हटाइएमा जिल्लाका उद्योगी, व्यवसायी तथा सर्वसाधारण करदातालाई ठूलो समस्या पर्ने भन्दै निर्णय तत्काल फिर्ता लिन माग गरेको छ । धर्नामा सहभागी उद्योगी तथा व्यवसायीहरूले कर तिर्न, विवरण बुझाउन र अन्य प्रशासनिक सेवा लिन टाढा जानुपर्ने अवस्था सिर्जना हुने जनाएका छन् ।
रौतहट उद्योग वाणिज्य संघका पदाधिकारीहरूले करदाता सेवा कार्यालय जिल्लामै रहनु आर्थिक गतिविधि प्रवर्द्धनका लागि अनिवार्य रहेको बताउँदै, सरकारको निर्णयले स्थानीय व्यापार–व्यवसाय कमजोर हुने चेतावनी दिएका छन् । उनीहरूले माग पूरा नभएसम्म आन्दोलनका कार्यक्रमलाई थप सशक्त बनाउँदै लैजाने घोषणा गरेका छन् ।
धर्ना कार्यक्रममा विभिन्न व्यवसायी, संघसंस्थाका प्रतिनिधि तथा स्थानीय सरोकारवालाहरूको उल्लेखनीय सहभागिता रहेको छ ।
यस विषयमा सम्बन्धित निकायको औपचारिक प्रतिक्रिया आउन बाँकी रहेको छ ।
