विरगञ्ज ।। बाराको महागढीमाई नगरपालिकाको बरियारपुरमा मंसिरको तेश्रो साता पन्चवर्षिय गढीमाइ मेला लाग्दैछ । मेलामा बलि चढाइएपछिको राँगा र पाडाको मासु उठाउँदै आएकाहरुले यसपटक मासु नउठाउने घोषणा गरेका छन् । बलिदिएको जनावरहरुको मासु २४ घण्टामै गन्हाउन थाल्छ । एकैपटक धेरै जनावरको बलि दिईने भएकाले मासु व्यवस्थापन नै मेलाको चुनौति हुन्छ । यसअघि स्थानीय चमार समूदायले बलिपछिको मासु उठाउँदै आएको भएपनि अब नउठाउने चमार समूदायका अगुवा राजनारायण रामले बताउनुभयो । चमार जातिका अगुवाहरुको भेलाले गढीमाई मेलामा हुने पशुको काटमारमा सहभागि नहुने, बधस्थलबाट मासु नल्याउने र नखाने निर्णय गरेको छ । मेलामा बलि नदिन र फोहोर भए सरसफाइको जिम्मा पनि आफैं लिन उनीहरुले स्थानीय सरकारलाई आग्रह गरेका छन् । स्थानीय सरकारले पनि मेलालाइ व्यवस्थित गर्न, सरसफाइ र उनीहरुको माग सम्बोधनको लागि योजना बनाईरहेको महागढीमाई नगरपालिकाका प्रमुख उपेन्द्र यादव बताउनुभयो । हरेक पाँचवर्षमा एक पटक लाग्ने गढीमाइको मेलामा राँगा र पाडा गरि करिब २५ हजारको संख्यामा पशुको बलिदिने गरिन्छ, जसको चौतर्फि बिरोध हुँदै आएको छ भने कतिले बलि रोक्न माग गरेका छन् ।
