सर्लाही ।। सर्लाहीमा बसको ठक्करबाट एक युवकको मृत्यु भएको छ। पूर्वपश्चिम राजमार्ग अन्तर्गत बागमती नगरपालिका ४ पुरानो चौकीमा दुई मोटरसाइकल आपसमा ठोक्किँदा बसले किचिएर एकजनाको मृत्यु भएको हो । अन्दाजी ३५ वर्षीय मृतकको पहिचान नखुलेको प्रहरीले जनाएको छ । सर्लाहीका प्रहरी प्रवक्ता दिपेन्द्र सिंह पजियारका अनुसार शनिबार साँझ करिब ७ बजेको समयमा तीव्र गतिमा रहेको प्र२ ०३ ००६ प ६७ मोटरसाइकल र बा २ ब ५७६६ नम्बरको मोटरसाइकल आपसमा जुध्दा प्र २ ०३ ००६ प ६७ नम्बरको मोटरसाइकलमा सवार युवक सडकमा खसेका थिए । त्यहीबेला मलंगवाबाट काठमाडौँ तर्फ जाँदै गरेको ना७ ख १८३६ नम्बरको बसले किच्दा युवकको घटनास्थलमै मृत्यु भएको हो । मृतकको शव पोस्टमार्टमको लागि प्रादेशिक अस्पताल मलंगवामा राखिएको छ । दुर्घटनापछि बसका चालकलाई प्रहरीले नियन्त्रणमा लिएको छ । दुर्घटनामा परेको मोटरसाइकलका चालक भागेको कारण मृतक युवकको सनाखतमा समस्या परेको डीएसपी पञ्जियारले बताए ।
