सर्लाही ।। सरकारले नेपाल–भारत सीमा नाका खोल्ने निर्णय गरेको एक साता भैसके पनि सर्लाहीसहित देशका विभिन्न सीमा नाका अझैँ खुल्न सकेका छैनन् । जिल्लामा कोरोना सङ्कट व्यवस्थापन केन्द्र (डीसीसीएमसी) को बैठकले सर्लाही जिल्लाका विभिन्न आठवटा नाकाहरु खुलाउने निर्णय गरेको थियो । केन्द्रले सर्लाही सदरमुकाम मलङ्गवास्थित गोरखकाली नाकासँगै भाँडसर, सङ्ग्रामपुर, पर्सा, त्रिभुवन नगर, बारा उद्योरण, फेन्हरा र बलरा नाका खुलाउने निर्णय गरिसकेको छ । सीमावर्ती क्षेत्रस्थित विष्णु गाउँपालिकाका स्थानीयबासीले भने सीमामा अवरोध कायमै रहेको बताएका छन् । तर सर्लाहीका प्रमुख जिल्ला अधिकारी राम कुमार महतोले नाकाहरुबाटै नेपाल प्रवेशका लागि सहजीकरण गरिरहेको बताउनु भएको छ । नेपालबाट भारत प्रवेशको हकमा भने भारत सरकारकै निर्णयानुसार हुने प्रमुख जिल्ला अधिकारी महतोले बताउनुभयो । सदरमुकाम मलङ्गवा नगरपालिकाका मेयर निरसल साहले मलङ्गवास्थित गोरखकाली नाकामा हेल्थ डेक्स सञ्चालनका लागि दुई जना स्वास्थ्यकर्मी परिचालन गरिएको बताउनुभयो । सुरक्षा निकाय र भन्सार कार्यालयले अझै पनि माथिबाट निर्देशन नआउन्जेल नाका नखुल्ने बताइरहेका मेयर साहको भनाइ छ । कोरोना सङ्क्रमणका कारण सरकारले गत वर्षको चैतदेखि नेपाल–भारत सीमा नाका बन्द गरेको हो । नाका नखुल्दा सीमावर्ती गाउँका वासिन्दा खोला खोल्सी र खेतको बाटो भएर नेपाल–भारत आवतजावत गरिरहेका छन् । वैकल्पिक बाटोबाट मानिसलाई हिँड्न दिइए पनि गाडी चल्न नपाउँदा स्थानीयहरुलाई औषधोपचार, किनमेल र सीमापारीको गाउँमा रहेका आफन्तहरुलाई भेट्न जान समस्या भइरहेको छ ।
