काठमाडाैं ।। नेपाल कम्युनिष्ट पार्टी (एकीकृत माक्र्सवादी लेनिनवादी) नेकपा एमाले र नेपाल कम्युनिष्ट पार्टी (माओवादी केन्द्र) अलग अलग राजनीतिक दलका रुपमा साबिककै अवस्थामा कायम रहने सर्वोच्चले आदेश दिएपछि निर्वाचन आयोग त्यसै अनुसार अघि बढ्ने भएको छ । नेकपा एमाले र माओवादी केन्द्रबीच एकीकरण गर्ने भएमा राजनीतिक दल सम्बन्धी ऐन तथा नियम विपरित नहुने गरी निर्णय गरी अविलम्ब निर्वाचन आयोगमा उपस्थित हुन जानकारी दिइ शीघ्र कानुन बमोजिम आवश्यक निर्णय गर्नगराउनू पनि सर्वोच्चले निर्वाचन आयोगका नाममा परमादेश जारी गरेको छ । निर्वाचन आयोगले भने सर्वोच्चको फैसलाको पूर्णपाठ आएपछि आवश्यक निर्णय गर्ने जनाएको छ । सर्वोच्चको हिजोको निर्णयपछि प्रधानमन्त्री समेत रहनुभएका नेकपा ओली समूहका अध्यक्ष केपी शर्मा ओलीले अदलातको निर्णयको सम्मान गरिने बताउनुभयो । आगामी रणनीति बनाउन ओली समूहले भने संसदीय दलको बैठक बोलाएको छ । संसदीय दलको बैठक प्रधानमन्त्रीको सरकारी निवास बालुवाटारमा केहीबेरमा बस्ने नेताहरूले बताएका छन् । प्रचण्ड–नेपाल समूहका नेता जनार्दन शर्माले भने अदालतको निर्णयमा शङ्का व्यक्त गर्दै पार्टीमा छलफल गरी निर्णय लिइने बताउनुभयो । ओली पक्षका नेताहरुले भने नेकपा अब बिधिवत रुपमा एकता हुने बाटोमा पुगेको बताएका छन् ।
