एजेन्सी ।। बलिउडका लोकप्रिय अभिनेता सैफ अली खानको फिल्म ‘तान्हाजीः द अनसङ वारिअर’ले बक्स अफिसमा धमाका मच्चाइरहेको छ । ‘तान्हाजी’ मा अजय देवगन, सैफ अली र काजोलले मुख्य भूमिका निभाएका छन् ।
फिल्मको सफलतासँगै सैफ अलीले दिएको एक अभिव्यक्तिका कारण उनी विवादमा तानिएका छन् । उनले ‘तान्हाजी’ बारे कुराकानी गर्ने क्रममा दिएको उक्त अभिव्यक्तिलाई लिएर सामाजिक सञ्जालमा खानको चर्को आलोचना भइरहेको छ ।
हालै फिल्मबारे कुराकानी गर्ने क्रममा सैफ अलीले ‘यो इतिहास हो भनेर मलाई लाग्दैन’ भनेका थिए । साथै उनले भनेका थिए- ‘अंग्रेज आउनपूर्व इन्डियाको कुनै अवधारणा थियो भन्ने मलाई लाग्दैन ।’ अर्थात् उनको यो भनाइले भारतमा अंग्रेज आउनुपूर्व ‘इन्डिया’ भन्ने देश नै नभएको अर्थ लाग्छ ।
सैफ अलीको उक्त भनाइप्रति सामाजिक सञ्जाल प्रयोगकर्ताले आपत्ति जनाएका छन् । सामाजिक सञ्जालमा सैफको भनाइको मात्रै विरोध गरिएको छैन । उनका छोरा तैमूर अली खानको नामलाई समेत मानिसले निशाना बनाएका छन् ।
केही मानिसले छोराको नाम तैमूर राखेकोमा यसअघि समेत सैफ र करिनाको विरोध गरेका थिए । मुस्लिम अतिक्रमणकारी तैमूरले भारतमा कैयौं हिन्दूको हत्या गरेको र हत्याराको नामसँग मिल्ने गरी छोराको नाम राखेपछि विरोध गरिएको थियो ।
‘प्रिय सैफ अली खान, कृपया यी पुराना मानचित्र हेर्नुहोस्, अंग्रेजले नै इन्डियाको अस्तित्वबारे उल्लेख गरेका छन्’, एक सामाजिक प्रयोगकर्ताले लेखेका छन् ।
त्यस्तै अर्का प्रयोगकर्ताले सैफको भनाइप्रति प्रतिक्रिया दिँदै लेख्छन्- ‘जब अंग्रेज आउनुपूर्व इन्डियाको कुनै अवधारणा नभएको भए उनीहरूले किन इस्ट इन्डिया कम्पनी भन्ने नाम राखे ? सैफ र अनुपमासँग कसैले सोध्नुहोला ।’
हालै रिलिज भएको ‘तान्हाजी’ले सफलता हात पारिरहेको बेला आफ्नो भनाइका कारण सैफ विवादमा तानिएका छन् । ‘तान्हाजी’मा सैफले उदयभान सिंहको भूमिका निभाएका छ्न् । देवगन र सैफको यो फिल्मबारे समीक्षकले मिश्रित प्रतिक्रिया दिएका छन् ।
हाल बक्स अफिसमा धमाका मच्चाइरहेको ‘तान्हाजी’ले १७० करोडभन्दा बढी कमाइसकेको छ । । फिल्मले ‘मिशन मंगल’ र ‘दबंग ३’ रेकर्ड तोड्ने तयारी गरिरहेको छ । महाराष्ट्र र गुजरात जस्ता राज्यमा फिल्मलाई निकै मन पराइएको छ ।
