रौतहट ।। रौतहटमा एकैदिन छुट्छुटै स्थानमा ट्यकटरको ठक्करबाट तीन जनाको मृतयु भएको छ भने एक जना घाइते भएका छन् । बिहिबार साँझ गौर चन्द्रपुर सडकखणडको शुकदेवचोक नजिकै ना ५ त ९२६७ नम्बरको ट्याक्टरले ना ४८ प ५७६ नम्बरको मोटरसाइललाई ठक्कर दिँदा एक जनाको मृत्यु भएको छ । ज्यान गुमाउनेमा माधव नरायण नपा–६ माधोपुरका ४५ वर्षीय रामअधार ठाकुरको मृत्यु भएको हो । ठक्करबाट गम्भिर घाइते मोटरसाइकल चालक सोही ठाँउका २२ वर्षीय सुशील ठाकुरको वीरगञ्जस्थित तराई अस्पतालमा उपचार भइरहेको इलाका प्रहरी कार्यालय गरुडाका प्रमुख डीएसपी ज्ञानकुमार महतोले जानकारी दिए । गएराती नै बृन्दावन नपा–७ धमौरास्थित गौर चपुर सडकखण्डमा आलु बोकेर हर्षाहातर्फ गइरहेको ना ७ च ६१६९ नम्बरको ट्याक्टरले पैदलयात्रु ठक्कर दिदा एक जनाको ज्यान गएको छ । देवाही गोनाही नपा–४ की ३५ वर्षीया मिरादेवीलाई ठक्कर दिएको थियो । उनको उपचारको क्रममा मृत्यु भएको प्रहरीले जनाएको छ ।
ठक्कर दिने ट्याक्टर र चालकलाई प्रहरीले नियन्त्रणमा लिएको छ । त्यसैगरी गएरातीनै कटहरिया नपा–९ डुमरियास्थित बाबा बैजुनाथ सुगर एण्ड केमिकल इन्डस्ट्रिजमा उखु बोकेको ना१त ४१४० नम्बरको ट्याक्टरले ठक्कर दिँदा एकजना पुरुषको मृत्यु भएको प्रहरीले जनाएको छ ।मृतकको पहिचान नखुलेको प्रहरीले जनाएको छ । ट्यक्टरचालक फरार रहेको र खोजी भइरहेको प्रहरीले जनाएको छ ।
