पाल्पा ।। पाल्पा रिब्दीकोट गाउँपालिका ७ मैनादीका एकल महिलाहरुले हिजोआज सहकारी मार्फत ब्यावसायिक खेति गर्न थालेका छन् । जसबाट महिलाहरुले राम्रो आम्दानी पनि गर्न थालेका छन् । रिब्दीकोट गाउँपालिकाले एकल महिला केन्द्रित कार्यक्रम लागु गरेको छ । गाउँपालिकाले दिएको तालिमपछि महिलाहरु उत्पादनमा केन्द्रित भएका छन् । गाउँका एकल महिलाहरुले गाउँमै रहेको कृषि सहकारी मार्फत ऋण लिएर व्यावसायीक तरकारी र फलफूल खेती गरेका छन् । जसका माध्यमबाट उनीहरुले कमाइरहेका छन् । अब स्थानीय तहले बजारको व्यवस्था गरिदिए झन् सजिलो हुने व्यवसायि महिला शिब कुमारी कुवँरको भनाई छ । महिलाहरुले मौसमी र बेमौसमी दुबै किसिमको तरकारी खेती गरिरहेका छन् । उनीहरुले सामुहिक तथा एकल रुपमा पनि खेती गरिरहेका छन् । महिलाहरुले बन्दा, काउली,सिमि, आलु लगाएत तरकारी फलाएका छन् । गाउँपालिकाले कृषि तालिम दिएपछि थप उत्साहित भएको किसान शान्ता कुवँर बताउनुहुन्छ । एकल महिलाहरु लाई संगठित बनाएर उनीहरुलाइ आत्मनिर्भर बनाउन यस्ता कार्यक्रम लागू गरिएको गाउँपालिकाका अध्यक्ष नारायण बहादुर जीसीले बताउनुभयो । कृषि पेशामा लागेका किसानहरु लाई नगद अनुदान दिनेदेखि आवश्यक सिपमा तालिम दिने योजना गाउँपालिकाले बनाएको छ ।
