जुम्ला ।। जुम्लाको नेत्रहिन संघले देउसी भैलो खेलेर जम्मा गरेको रकमले दृष्टिविहिन व्यक्तिहरुलाई आवश्यक सामग्री वितरण गरेको छ । हिजो अपाङ्ग दिवसको अवसरमा १७ जनालाई सेतो छडी, ४ जनालाई अडियो पुस्तक र न्यानो कपडा वितरण गरिएको हो । सरकारी तवरबाट सेतो छडी वितरण नहुनु दुःखद् भएको नेत्रहिन संघ जुम्लाका अध्यक्ष धनप्रसाद न्यौपानेले बताउनुभयो । सेतो छडी, दृष्टिविहिनहरुलाई आवतजावत गर्न सहारा दिने एकमात्र उपकरणका रुपमा लिने गरिन्छ । सेतो छडीको माध्यमबाट दृष्टिविहिनहरु स्वतन्त्र रुपमा हिड्डुल गर्न सक्छन् । अडियो अर्थात् सुन्न सकिने पुस्तक पाएपछि दृष्टिविहिनहरुले खुसी भएका छन् । नेत्रहिन संघ जुम्लाले न्यानो कपडा तथा सुन्न सकिने खालका पुस्तक दिएपछि दृष्टिविहिनहरु खुसी भएका हुन् । संविधानले अपाङ्गताको आधारमा कुनै पनि प्रकारको भेदभाव गर्न, सेवा सुविधा र अवसरबाट बञ्चित गर्न नपाइने प्रावधान सुनिश्चित गरेको छ ।
