रौतहट ।। जिल्ला प्रशासन कार्यालय रौतहट गौरमे स्थानिय भाषामे अडियो नागरिकवडापत्र संचलानमे आएल हए । गााँओ घरसे आवेवाला सेवाग्राहीसबके असानीके लेल स्थानिय भाषा बज्जिकामे अडियो नागरिक वडापत्र संचालनमे लेआएल गेल हए ।
जिल्ला प्रशासन कार्यालयके देवाल पर नेपाली नागरिक वडापत्र लिखल गेला पर भी गाँओसे आवेबाला लोगके पढके बुझेमे दिक्कत हो रहलासे स्थानिय बज्जिका भाषामे अडियो नागरिकवडापत्र कार्यालय समय तक निरन्तर बजईत रहलासे लोगके कामकाज कराबेके लेल असान होए इहे सोचके स्थानिय भाषामे नागरिक वडापत्र रेकर्ड कराके बजाबेके सुरु भेल प्रमुख जिल्ला अधिकारी किरण थापा बतएले छत् ।
एसे पहिले भि स्थानिय बुद्धजिवीलोग स्थानिय भाषामे नागरिक वडापत्र राखेके सल्लाह देला पर भी लागु होए न सकल रहे । प्रजिअ थापाके पहलमे स्थानिय भाषा बज्जिका आ नेपाली दुनु नागरिक वडापत्रमे रहल बातसब रेकर्ड कराके बजाबेके सुरु भेल हए । गाँओ घरसे आवे वाला सब लोग पढल लिखल न रहलासे अडियो सुनके उ लोगके भि असानीसे सब किछोके जानकारी होओ सोचके साथ बज्जिका पत्रकार संघके सचिब चञ्चल कुमार झाके अवाजमे रहल बज्जिका आ नेपाली दुनु भाषाके अडियो नागरिक वडापत्र बजाएल जा रहल जिल्ला प्रशासन कार्यालय रौतहट गौरके सुचना अधिकारी शशीमोहन दासके कहनाम रहल है ।
स्थानिय भाषामे अडियो नागरिक वडापत्र संचालनमे अएलाबाद चारुओरिसे सराहना कएल जा रहल हए जिल्ला प्रशासन कार्यालय रौतहट गौरके नायब सुब्बा राम नरेश साह बतएले छत् । एसे पहिले जिल्ला प्रशासन कार्यालय सर्लाहीमे बज्जिका भाषामे नागरिक वडापत्रके अडियो संचालनमे आएल रहे ।
