काठमाडाैं ।। सामाजिक सञ्जाल ट्वीटरले सबै खालका राजनीतिक विज्ञापनलाई प्रवितबन्ध लगाउने भएको छ । ट्वीटरले आफूलाई राजनीतिक विज्ञापनको माध्यम बन्न नदिने बताएको हो । ट्वीटरका कार्यकारी अधिकृत ज्याक डोर्सीले इन्टरनेटमार्फत् गरिने विज्ञापन निकै प्रभावकारी हुने र यो व्यापारका लागि ठीक भएपनि राजनीतिमा यसले ठूलो जोखिम ल्याउने बताउनुभएको छ । यसको विपरित फेसबुकले भने राजनीतिक विज्ञापनलाई बन्द नगर्ने घोषणा गरिसकेको छ । ट्वीटरमा राजनीतिक विज्ञापन बन्दको समाचारसँगै यसले अमेरिकाको राजनीतिमा नयाँ तरङ्ग ल्याइदिएको छ । राजनीतिज्ञ र आम मानिस यसको पक्ष र विपक्षमा देखिएका छन् ।