काठमाडाैं ।। नेकपा एमालेका अध्यक्ष केपी शर्मा अाेलीले संविधानको व्यवस्थाविपरीत प्रधानमन्त्री पद नबाँड्न कांग्रेस सभापति शेरबहादुर देउवालाई सुझाव दिएका छन् ।
शनिवार संसद् भवन नयाँ बानेश्वरमा एमाले सांसदका लागि आयोजना गरिएको प्रशिक्षण कार्यक्रममा ओलीले प्रधानमन्त्रीको उधारो आश्वासन बाँड्नेले पनि संविधान बुझेको भन्दै त्यस्तो धन्धामा नलाग्न देउवालाई सुझाव दिएका हुन् ।
‘देउवाले वीई वील कमब्याक भनेको सुने, ह्वेन दे विल कमब्याक ? पार्टीहरूलाई प्रधानमन्त्री बाँडिरहनु भएको छ’, ओलीले भने, ‘यो सरकारले विश्वासको मत प्राप्त नगरे संविधानको धारा ७६ को ३ अर्थात ठूलो पार्टीको दलको नेताले प्रधानमन्त्री पाउँछ । अहिले संसदमा आएका दलका नेताले त्यतिको धारा नबुझेको होला ?’
पुस १० गते ५ बजेसम्म अल्मल्याएर ७६(३) अनुसारको सरकार बनाउन कांग्रेसले योजना बनाएको ओलीले बताए । ‘हामीलाई त छक्याउन खोज्छ भने, अरुलाई किन नगरोस् । उस(कांग्रेस)को धन्दा त्यही हो ।’
कांग्रेस सभापति देउवाले राप्रपा अध्यक्ष राजेन्द्र लिङदेनलाई प्रधानमन्त्री बनाउन आश्वासन दिँदै प्रधानमन्त्री पुष्पकमल दाहाल ‘प्रचण्ड’लाई विश्वासको मत नदिन आग्रह गरेको चर्चा बाहिरिएको थियो । अध्यक्ष ओलीले नेपालीले बनाएको सरकारलाई सफल बनाउने कर्तव्य एमालेकै रहेको भन्दै २६ गते प्रतिनिधिसभामा बहुमत पुर्याउने बताए ।
