काठमाडौँ ।। प्रतिनिधिसभा तथा प्रदेशसभाको चुनावका लागि राजनीतिक दलका नेता तथा उम्मेदवारहरुले प्रचार प्रसारमा गर्ने क्रम आज सकिँदैछ।
आज मध्यरातिदेखि स्थिर समय सुरु हुने भएपछि पूर्व निर्धारित कार्यक्रम अनुसार दलका शीर्ष नेताहरुलाई आज प्रचार प्रसारलाई सक्ने तयारी गरेका हुन्।
प्रधानमन्त्री एवं कांग्रेस सभापति शेरबहादुर देउवा आज सुदूरपश्चिमका दुईवटा चुनावीसभामा सहभागी बन्दै छन्। उनले अछाम र कञ्चनपुरका चुनावीसभालाई सम्बोधन गर्ने कार्यक्रम रहेको उनको सचिवालयले जनाएको छ। उनी अब मतदान गरेर मात्रै काठमाडौँ फर्कनेछन्। दार्चुलाबाट चुनावी अभियान थालेको नेकपा एमालेले झापामा अन्त्य गर्ने भएको छ। अध्यक्ष केपी शर्मा ओलीले आज झापामा आयोजना हुने दुई सभालाई सम्बोधन गर्दै छन्। निर्वाचन क्षेत्र नम्बर १ को काँकडभिट्टा र निर्वाचन क्षेत्र नम्बर ५ को खजुरगाछीमा आयोजना गरिने चुनावी सभालाई सम्बोधन गर्ने तयारी छ।
नेकपा माओवादी केन्द्रका अध्यक्ष प्रचण्ड भने काठमाडौँको चुनावी सभामा व्यस्त हुने सम्भावना रहेको उनको सचिवालयले जनाएको छ।यसैगरी नेकपा एकीकृत समाजवादीका अध्यक्ष माधवकुमार नेपाल पनि सोही चुनावी सभामा सहभागी हुने बताइएको छ।
निर्वाचन आयोगले कात्तिक १७ गतेदेखि मंसिर १ गते अर्थात आज मध्यराति १२ बजेसम्म १५ दिन निर्वाचन प्रचार प्रसार गर्ने समय तोकेको थियो।
