सङ्खुवासभा ।। सङखुवासभाको मादी नगरपालिका ६ रामबेनीको सात घुम्तिमा भएको बस दुर्घटनामा मृत्यु हुने व्यक्तिको सङ्ख्या १५ पुगेको छ । मादीको ओखरबोटेबाट झापाको दमक हिँडेको बा ४ ख ७३५ नम्बरको बस दुर्घटनामा पर्दा घाइते ४ जनालाई हेलिकप्टरबाट विपि कोईराला स्वास्थ्य विज्ञान प्रतिष्ठान धरान लगिएको छ । दुर्घटनामा ज्यान गुमाउनेहरुमा मादीका सीता विक (३०), अञ्जना कटुवाल (३२), भवानी प्रसाद दाहाल (४९), सोही गाउँका इन्द्र अधिकारी (४२), दीक्षा कटुवाल (५), बलबहादुर कार्की (६०), सविता कार्की (२८), दीपक दाहाल (४८), श्याम शेर्पा (५५), आइतबहादुर तामाङ (५३) उमेश भटराई (२८) र युका पोखरेल (२७) रहनु भएको प्रहरीले जनाएको छ । उमेश बसको सहचालक हुनुहुन्थ्यो । युकाको उपचारको क्रममा धरानमा मृत्यु भएको हो । अन्य ज्यान गुमाउनेहरूमा ताप्लेजुङका समीक्षा योञ्जन (३१), सुदिप घिसिङ (८) र तेह्रथुम फाक्चामारा घर भएका सवारी चालक बिपिन निरौला (३१) रहनु भएको प्रहरीको भनाइ छ । सानो गोलाइ र भिरालो बाटो भएकोले चालकले ब्रेक लगाउन नसकेको र दुर्घटना भएको हुन सक्ने प्रारम्भिक अनुमान गरिएको जिल्ला प्रहरी प्रमुख प्रहरी नायव उपरिक्षक लालध्वज सुवेदीले जानकारी दिनुभयो । तीब्र गतिमा रहेको सवारीसाधन मोड्न नसक्दा पहिलो मोडमा नै दुर्घटना भएको पाइएको प्रहरी नायब उपरीक्षक सुवेदीले जानकारी दिनुभयो । जिल्ला ट्राफिक प्रहरी कार्यालय सङ्खुवासभाका प्रहरी नायव निरीक्षक मनबहादुर खत्रीका अनुसार सवारी चालक निरौलाले यस अघि खाँदबारी–काठ्माण्डौ रुटमा बस चलाउदै आउनुभएको थियो ।
