महोत्तरी ।। महोत्तरीका जेष्ठ नागरिकहरूले सामाजिक सुरक्षा भत्ता लिनको लागि समस्या भोग्नु परेको गूनासो गरेका छन् । संविधान अनुसार सरकारले दिएको अधिकार उपयोग गर्नमा पनि कठिनाइ भएको उनीहरू बताउँछन् । राज्यले उपलब्ध गराउदै आएको सामाजिक सुरक्षा भत्ता लिनमा असहज भएको महोत्तरी गौशालाका ज्येष्ठ नागरिक चित्राखर दुलालको गूनासो छ । सामाजिक सुरक्षा भत्ता वितरणमा पारदर्शिता ल्याउनको लागि अहिले बैङ्किङ प्रणालीको व्यवस्था गरिएको छ । तर, बैङ्किङ व्यवस्थाका कारण सहज हुनुको साटो उल्टै दुःख भोग्नु परेको जेष्ठ नागरिक गूनासो गर्छन् । गत पुष १४ गते गौशाला नगरपालिका अन्तर्गत सिद्घार्थ बैङ्कले भत्ता वितरणमा लापरवाही गरेको भन्दै जेष्ठ नागरिकले आन्दोलन नै गरे । सामाजिक सुरक्षा भत्ता लिन जाँदा गत माघ १२ गते गौशालाको नेपाल बैङ्कको भ¥याङबाट लडेर दुईजना वृद्घ घाईते समेत भए । बैङ्कका संरचना जेष्ठ नागरिक मैत्री छैन भने सेवा पनि जेष्ठ नागरिक मैत्री नभएको र छिटो छरितो नभएको गूनासो जेष्ठ नागरिकको रहेको छ । आफ्नै खातामा आउने रकम प्राप्त गर्नको लागि पनि सर्वसाधारणले सास्ती खेप्नु परेको र यसलाइ स्थानीय पालिकाले व्यवस्थित नबनाईदिएको भन्दै आलोचना पनि हुने गरेको छ । सामाजिक सुरक्षा भत्ता वितरणलाई थप व्यवस्थित बनाउन गौशाला नगरपालिकाले बैङ्कसँग छलफल गरिरहेको उपप्रमुख आशा लामाले बताउनुभयो । उहाँले ज्येष्ठ नागरिकलाई वितरण गरिने सामाजीक सुरक्षा भत्तालाई सहज रुपमा व्यवस्थापन गरिदिनका लागि पालिकाले पहल गरिरहेको बताउनुभयो । देशभरका जेष्ठ नागरिकले लगभग यस्तै समस्या भोग्दै आएका छन् । लक्षित वर्गलाई राहत पुगोस भन्ने उद्देश्यले सरकारले वितरण गर्दै आएको सामाजिक सुरक्षा बापद्को रकम रकम सहज रूपमा उपलब्ध गराउने वातावरण बनाइदिन जेष्ठ नागरिकको माग छ ।
