काठमाडाैं ।। शिक्षा मन्त्रालयले विद्यालय सञ्चालन सम्बन्धि कार्यढाँचा २०७७ लाई पालना गर्दै विद्यालय सञ्चालन गर्न निर्देशन दिइएको भए पनि कार्यान्वयन सन्तोषजनक देखिएको छैन । नेपालमा कोरोनाको नयाँ प्रजाति ओमिक्रोन पुष्टि भइसकेकाले विद्यार्थीलाई सङ्क्रमणबाट बचाउन प्रत्येक दिन प्रत्यक विद्यार्थीको ज्वरो परीक्षण गर्ने, मास्कको अनिवार्य प्रयोग गर्ने, असम्बन्धित व्यक्तिलाई विद्यालय प्रवेशमा रोक लगाउन कार्यढाँचामा भनिएको छ । त्यसैगरी सफा पानीसहितको हात धुने स्थान तोक्ने र सरसफाइका सामग्रीको व्यवस्था गर्ने, कक्षाकोठामा एक विद्यार्थीदेखि अर्को विद्यार्थीको दुरी कम्तिमा १ मिटर अनिवार्य कायम गर्न भनिएको शिक्षा तथा मानव स्रोत विकास केन्द्रका सूचना अधिकारी सुरेशकुमार जोशीले बताउनुभयो । सरकारले पठाएको कार्यविधिमा उल्लेख गरिएका बुँदा महामारी नियन्त्रणका लागि फाइदाजनक भए पनि कार्यान्वयनमा भने धेरै स्थानमा समस्या छ । माध्यमिक तहसम्मको अधिकार स्थानीय तहलाई छ तर सबै स्थानीय तह स्वास्थ्य मापदण्ड पालनामा गम्भीर छैनन् । बैतडीका एक जना विद्यार्थी गजेन्द्र धामीले विद्यालयमा स्वास्थ्य मापदण्ड पालनामा कडाइ नभएको बताउनुभयो । अर्घाखाँचीको सन्धिखर्क नगरपालिका २ मा रहेको जनज्योति माध्यमीक विद्यालयका साहिल सुनारले लामो समय विद्यालय नखुल्दा पढ्न नपाए पनि हिजोआज सावधानी अपनाएर पढ्न पाइएको बताउनुभयो । कोरोना सङ्क्रमणदरमा कमि आएपछि विद्यालयहरूले स्वास्थ्य सावधानी अपनाएर पठनपाठन भइरहेको विद्यालयका शिक्षक रबिन्द्रबहादुर खड्काले बताउनुभयो । नेपाल आएका एक विदेशी नागरिक र उनको सम्पर्कमा आएका अर्का १ जनामा १० दिनअघि मात्रै ओमिक्रोन पुष्टि भएको थियो ।
