काठमाडाैं ।। सन् २०१९ को डिसेम्बरमा कोरोना सङ्क्रमण देखिएपछि वैज्ञानिकहरु भाइरसलाई लिएर अनभिज्ञ थिए । अहिलेसम्म पनि महामारीको बारेमा ठोस निस्कर्ष निस्कन सकेको छैन । भारतमा सङ्क्रमण बढेसँगै नेपालमा पनि दोस्रो लहरको सुरु भनेर, चर्चा हुन थालेको छ । नारायणी अस्पतालमा वीरगञ्मा कोरोना उपचारमा खटिनु भएका डा. निरज सिंहलाई अब नेपालमा कोरोना सकियो भन्ने लागेको थियो । तर, सङ्क्रमणका हिसावले आजभन्दा ठीक एक वर्ष अघिकै अवस्थामा फर्किएको अनुभव गरिरहनुभएको छ । कारण, सून्य दर रहेको जिल्लामा सङ्क्रमित थपिने दर बढ्दैछ । सरकारले चैत ११ गतेका दिन देशव्यापी लकडाउनको घोषणा गरेको थियो । त्यतिखेर जम्मा सङ्क्रमितको सङ्ख्या ३ थियो । अहिले नेपालमा सङ्क्रमितको संख्या २ लाख ७६ हजार नाघिसकेको छ । दुई महिना अघि घटेको सङ्क्रमण फेरि बढेर पुरानै अवस्थामा फर्किने अवस्थामा छ । चीन, स्पेन, बेलायत, इटली लगायतका मुलुकमा दोस्रो चरणको कोरोनाको लहर सुरु भइसकेको थियो । छिमेकी मुलुक भारतसहितका अन्य मुलुकहरुमा कोरोनाको दोस्रो चरणको लहर फैलिदै गर्दा गर्दा नेपालमा पनि त्यसको प्रभाव देखिन सक्ने विज्ञहरुले आँकलन गरेका थिए । ५ महिना अघि नेपालका ६८ जिल्लामा नयाँ सङ्क्रमित थपिने थाल्दा विज्ञले सचेत गराएका थिए । विज्ञले भनेका कुरामा अहिले सरकार सचेत बन्ने तयारी गर्दैछ । इपिडिमियोलोजी तथा रोग नियन्त्रण महाशाखाका प्रमुख डा.कृष्ण पौडेलले कोभिड विशेष अस्पताललाई फेरि ब्युताउँने, सबै सीमा नाकाहरुमा हेल्थ डेस्क राख्ने, एन्टिजेन परीक्षण गर्ने, कोरोनाको सम्पर्क÷संसर्गको खोजी गर्ने लगायतका कामलाई फेरी सुरु गर्ने कामका लागि सबै निकायलाई परिपत्र गरिएको बताउनुभयो । चीन हुँदै मध्यपूर्वी मुलुक इरानपछि युरोप प्रवेश गरेको कोरोना सङ्क्रमणको अहिले विश्वका ६० भन्दा बढी मुलुकमा दोस्रो लहर सुरु भइसकेको छ । भाइरसबाट लड्ने एक मात्रै विकल्प खोप भनिएपनि पछिल्लो समय खोपको दुबै डोज लगाइसकेकामा पनि सङ्क्रमण देखिँदा त्यसले सङ्क्रमितको दर बढेको देखिन्छ ।
