रौतहट ।। रौतहटमा पुन कोरोना सङ्क्रमित बढन थालेका छन् । केही दिन अगाडी देखि रौतहटमा दिनानुदिन सङ्क्रमितको दरमा बृद्धि हुदै गएको हो । विजया दशमी अगावै कोरोना सङ्क्रमित शुन्य रहेको रौतहटमा केही दिन यतादेखि सङ्क्रमण दर बढ्दै जान थालेको हो । पछिल्लो एक सातामा रौतहटमा १ सय ८९ जनाको स्वाब परीक्षण गरिएकोमा १ सय जनामा कोरोना सङ्क्रमण पुष्टि भएको जिल्ला अस्पताल गौरले जनाएको छ । रौतहटमा हाल २ हजार ६४ जना सङ्क्रमित रहेको जिल्ला प्रशासन कार्यालय रौतहटले जनाएको छ । कोरोनाका कारण रौतहटमा हालसम्म १४ जनाले ज्यान गुमाइ सकेका छन ।बजारहरुमा बढी भिडभाड हुनु, व्यक्तिगत दुरी कायम नहुनु, सचेतना नअपनाउने बानीले गर्दा जोखिम झनै बढेको गौर अस्पतालका डा. कृष्ण साहको भनाइ रहेको छ । पछिल्लो समय, स्थानीयसँगै जिल्लाका सुरक्षा अधिकारीहरु, जनप्रतिनिधि, कार्यालयका कर्मचारीहरु संक्रमित हुने क्रम बढेको छ । कोरोना महामारी नियन्त्रणका लागि जिल्ला विपद् व्यवस्थापन समिति तथा जिल्ला स्तरीय कोभिड संकट व्यवस्थापन केन्द्रको संयुक्त बैठकपछि नयाँ रणनिति तयार गरिने प्रमुख जिल्ला अधिकारी इन्द्रदेव यादवले बताउनु भयो ।बजार, कार्यालय, व्यापार कोरोना महामारीमा पहिलेकै अवस्थामा झैं सञ्चालनमा आएको छ तर सुरक्षाको उपाय भने अपनाएको देखिएको छैन । स्थानीयले मास्क, भौतिक दुरी तथा स्वास्थ्य सचेतनामा ध्यान दिन छोडेका छन् ।
