काठमाडाैं ।। मौसमविद्हरूले अब दिउँसोपछि हावाहुरीसहित मेघगर्जन र चट्याङ् पर्ने क्रम बढ्दै जाने बताएका छन् । मनसुन पूर्वको अवस्था सुरु भइसकेकाले दिउँसोपछि हावाहुरीसहित मेघगर्जन र चट्याङ् पर्न सक्ने मौसम पूर्वानुमान महाशाखाका मौसमविद् हिरा भट्टराईले बताउनुभयो । उहाँले हिँडडुल गर्दा ख्याल गर्न पनि सुझाव दिनुभयो । मनसुन पूर्वको समयमा बिहान मौसम सफा भएपनि दिउँसोपछि हावाहुरीसहित मेघगर्जन र चट्याङ् पर्ने गर्छ । मनसुन पूर्वको अवस्था तीन महिनाको हुन्छ । जाडो महिना सकिएपछि मनसुन पूर्वको अवस्था सुरु हुने उहाँको भनाइ छ । अब विस्तारै गर्मी पनि बढ्ने भएकाले स्वास्थ्यको ख्याल गर्न पनि मौसमविद् भट्टराईले सुझाव दिनुभयो । यसैबीच आज देशभरि कै मौसम सामान्यतया सफा रहने उहाँले बताउनुभयो । मौसम सफा भएसँगै न्यूनतम र अधिकतम तापक्रम बढेर दिउँसो गर्मी हुन थालिसकेको छ ।
