हुम्ला ।। हुम्लामा मौसमी रुघाखोकीका कारण डेढ महिनाको अवधीमा १४ जनाको मृत्यु भएको छ । केही दिनअघि पाँच जनाको मृत्यु भएको खबर आएको थियो । तर, हुम्लाका सबै स्थानीय तहको विवरण सङ्कलन भएपछि मृत्यु हुनेको सङ्ख्या १४ पुगेको तथ्य बाहिर आएको हो । मौसमी रुघाखोकी प्रभावित क्षेत्रमा प्रदेश सरकारले स्वास्थ्यकर्मीको टोली र औषधि पठाएको छ । तर, हिजोदेखि हिमपात हुन थालेपछि प्रभावति क्षेत्रमा स्वास्थकर्मीको टोली जान समस्या भएको छ । चिसोले फैलिएको मौसमी रुघाखोकीका विरामी बढ्न थालेका छन् । मोसमी रुघाखोकीले पुष देखि माघ १३ गतेसम्म चंखेली, सर्केगाड र खार्पूनाथ गाउँपालिकामा १४ जनाको मृत्यु भएको छ । कर्णाली प्रदेश सरकार स्वास्थ्य निर्देशनालयले माघ १२ गते आईतबार नै उपकरण, औषधि सहित स्वास्थ्यकर्मीको टोली पठाएको भएपनि प्रभावित क्षेत्रमा पुग्न सकेको छैन । आजसम्म हिमपात नरोकिए, हेलिकप्टर मार्फत चिकित्सकको टोली प्रभावित क्षेत्रमा पु¥याईने कर्णाली प्रदेशका सामाजीक बिकास मन्त्री दल रावलले बताउनुभयो । जिल्लाका विभिन्न गाउँमा फैलिएको रुघाखोकी र ज्वरोलाई स्थानीय स्वास्थ्यकर्मीले मौसमी रुघाखोकी भनेका छन् । तर, स्थानीय स्वास्थ्य संस्थामा पर्याप्त औषधि र दक्ष स्वास्थ्यकर्मी नहुँदा नियन्त्रणमा ल्याउन समस्या परेको छ । खार्पुनाथ गाउँपालिकाका स्वास्थ्य शाखा संयोजक बलिराज शाहीले गाउँगाउँमा विरामीको सङ्ख्या बढिरहेको भएपनि स्थानीय सरकारले गम्भीर अवस्था नरहेको बताउनुभयो । तर, हुम्लाका नागरिक स्वास्थ्य चौकी र सामुदायिक स्वास्थ्य इकाईमा सिटामोल समेत नपाएको बताईरहेका छन् ।
