सुर्खेत ।। कर्णाली प्रदेशमा कर्मचारी जान नमान्दा प्रदेशको योजना कार्यान्वयमा समस्या देखिएको छ । भुगोलकै कारण देखाउँदै कर्मचारी समायोजनपछि पनि कर्णाली प्रदेशमा कर्मचारी पुगेका छैनन् । कर्णालीका जिल्लामा कर्मचारी अपर्याप्त हुँदा विकास निर्माणमा चुनौति हुँदै आएको छ । कर्णाली प्रदेशमा अहिल १ हजार ३४ कर्मचारीले काम गरिरहेका छन् । १० जिल्लाको कर्णाली प्रदेशमा अझै ६ सय कर्मचारीको अभाव छ । कर्णाली प्रदेशलाई अहिले पनि दुर्गम क्षेत्रको रुपमा सोचेकाले कर्मचारीहरु त्यहाँ जान नमानेको प्रदेशको उद्योग पर्यटन वन तथा वातावरण मन्त्रालयको वन अधिकृत शेरबहादुर रोकायले बताउनुभयो । कर्णाली जल, जमिन, जडिबुटी र पर्यटन क्षेत्रका हिसाबले धेरै अगाडी छ । यसलाइ उपयोग गर्दै समृद्ध प्रदेश बनाउने गरि प्रदेश सरकारले योजना बनाएको छ । तर हरेक जिल्ला र क्षेत्रमा कर्मचारीको अभावका कारण योजना कार्यान्वयनमा चुनौति देखिएको प्रदेशका प्रवक्ता तथा भुमी व्यवस्था सहकारी तथा कृषि मन्त्री बिमला केसीको भनाई छ । कर्णाली प्रदेश सरकारले कर्णाली पूर्वाधार विकास बैंक स्थापना गर्ने, लगानी भित्र्याउन लगानी सम्मेलन गर्ने, औद्योगिकरणका लागि उद्योग ग्राम स्थापना गर्ने, स्थानीय उत्पादन र उपयोगितालाई प्राथमिकता दिने बिषय समेटेर नीति तथा कार्यक्रम ल्याएको थियो । यस्तै सरकारले स्थानीय तहबाट जिल्ला सदरमुकाम–प्रदेश राजधानी जोड्न सडक सञ्जालको प्रारम्भिक अध्ययन गर्ने कर्णालीका खोलामा लगाईएका तुईन विस्थापित गर्ने लगाएतका सयौ योजना सार्वजनिक गरेको थियो । तर कर्मचारी अभाबमा यस्ता योजना पूरा हुनेमा आशंका देखिएको छ ।
