नुवाकोट ।। जिल्ला प्रशासन कार्यालय नुवाकोटले जिल्लामा रहेका क्रसरहरूको सथलगत अनुगमन गरेको छ । जिल्लाभित्र अवैधरूपमा सञ्चालित क्रसर तथा प्रशोधन केन्द्र बन्द गर्न निर्देशन दिए पछि प्रशासनले छड्के अनुगमन गरेको हो । एकै दिन जिल्लाका ६ वटा क्रसरहरूमा सहायक प्रमुख जिल्ला अधिकारी वेदप्रसाद अर्यालको नेतृत्वमा गएको सरकारी टोलीले अनुगमन गरेको हो । नुवाकोट प्रशासनले विशेष सूचना जारी गर्दै अवैधरुपमा सञ्चालित क्रसर बन्द गर्न निर्देशन दिएको थियो ।निर्देशनको अवज्ञा गरेको गुनासो आएपछि अनुगमन गर्दा अवैध रुपमा सञ्चालित चार वटा क्रसरमा ताला लगाइएको सहायक प्रजिअ अर्यालले जानकारी दिनुभयो । कानुन विपरित सन्चालन रहेको भेटिएपछि लिखु गाउँपालिकाको दुई, पन्चकन्या र तादी गाउँपालिकामा रहेका रहेका एक÷एक गरि चार वटा क्रसरमा ताला लगाइएको हो ।ढुङ्गा, गिट्टी तथा बालुवा उत्खनन, प्रशोधन सम्बन्धी क्रसर तथा उद्योगहरू सञ्चालन गर्दा कानुन बमोजिम व्यवसाय दर्ता तथा नवीकरण गर्नुपर्ने, उद्योग सञ्चालन गर्दा अनुमति लिनुपर्ने तथा नियमानुसार तोकिए बमोजिमको स्थान तथा परिमाणमा मात्र उत्खनन् तथा प्रशोधनको कार्य गर्नुपर्नेमा कहि कसैले दर्ता नगरी तथा नवीकरण लगायत सञ्चालन अनुमति नलिइ ढुङ्गा, गिट्टी तथा बालुवा उत्खनन तथा प्रशोधनलगायतका कानून विपरितका कार्य गरेको पाइएपछि स्थलगत अनुगमन गरिएको नुवाकोटका प्रमुख जिल्ला अधिकारी नारायणप्रसाद रिसालले बताउनुभयो । उहाँका अनुसार स्थलगत अनुगमन कार्य निरन्तर जारी रहने छ ।
