काठमाडाैं ।। प्रदेश १ का सांसदले आज शपथ ग्रहण गर्दैछन् । प्रदेशसभा सचिवालयले आज मध्यान्हसाढे १२ बजे प्रदेश प्रमुख पर्शुराम खापुङ्ले ज्येष्ठ सदस्य गयानन्द मण्डल गनगाईलाई शपथ ग्रहण गराउनुहुनेछ । ज्येष्ठ सदस्य गनगाईले अन्य सदस्यलाई दिउँसो साढे १ बजे प्रदेशसभा भवनमा शपथ गराउनुहुनेछ । आज प्रदेश १ का पाँच जना प्रदेश सांसदले मातृभाषामा शपथ लिँदैछन् । प्रदेश सांसदमा पाँचथर १(१) बाट दोस्रो पटक निर्वाचित आर्थिक मामिला तथा योजनामन्त्री माओवादी केन्द्रका इन्द्रबहादुर आङ्बो, इलाम १(१) बाट निर्वाचित पर्यटन तथा संस्कृति मन्त्री नेकपा (एकीकृत समाजवादी) का खिनुलङ्वा लिम्बुले मातृभाषामा सपथ लिनुहुनेछ । नेकपा (एकीकृत समाजवादी)का पाँचथर १(१) बाट निर्वाचित कमलप्रसाद जबेगु, काँग्रेसका ताप्लेजुङ १(२) बाट निर्वाचित खगेनसिंह हाङ्गाम र जनता समाजवादी पार्टीका निर्मला लिम्बूले मातृभाषा यक्थुङ÷लिम्बू भाषामा शपथ लिने प्रदेशसभा सचिवालयका सचिव गोपालप्रसाद पराजुलीले बताउनुभयो ।
