कोरोनाको चौथो लहरको जोखिम बढेपछि भारतीय प्रधानमन्त्री मोदी विभिन्न राज्यका मुख्यमन्त्रीहरूसँग छलफलमा

एजेन्सी ।। भारतमा कोरोना महामारीको चौथो लहरको जोखिम बढ्न थालेपछि प्रधानमन्त्री नरेन्द्र मोदीले आज विभिन्न राज्यका मुख्यमन्त्रीहरूसँग छलफल गर्न लाग्नुभएको छ । भारतको उत्तर प्रदेश, राजधानी दिल्ली, महाराष्ट्र लगायतका राज्यमा पछिल्लो समय कोरोना सङ्क्रमण बढ्न थालेपछि प्रधानमन्त्री मोदीले आज मध्याह्न सवा १२ बजेबाट मुख्यमन्त्रीहरूसँग छलफल गर्नुहुनेछ । छलफलमा कोरोनाको नयाँ सङ्क्रमणदरको अवस्था, कोरोनाविरुद्धको खोप अभियान, पूर्व तयारी लगायतका विषयमा छलफल हुने भारतीय सञ्चारमाध्यमहरूले जनाएका छन् । यसैबीच, भारतले ५ देखि १२ वर्षसम्मका बालबालिकाका लागि लगाउन मिल्ने कोरोनाविरुद्धको खोपलाई अनुमति दिएको छ । भारत बायोटेकले निर्माण गरेको कोभ्याक्सिनलाई ६ देखि १२ वर्षसम्मका बालबालिकालाई लगाउन आपतकालिन अनुमति दिइएको स्वास्थ्यमन्त्री मन्सुक मान्डव्यले जानकारी दिनुभएको छ ।