आज उम्मेद्वारी दर्ता गराउनेको सङ्ख्या न्यून

काठमाडाैं ।। आउदो ३० गते हुने स्थानीय तह निर्वाचनको लागि आज उम्मेद्वारी दर्ताको लागि समय तोकिएको भएपनि काठमाडौं तथा जिल्लाहरूमा थोरै सङ्ख्यामा मात्रै उम्मेद्वारी दर्ता भएको छ । निर्वाचन आयोगले उम्मेद्वारी दर्ताको लागि आज र भोलीको समय सीमा तोकेको छ । तर ठूला दलले अधिकांश स्थानमा उम्मेद्वारको टुङ्गो नै लगाएका छैनन् । साना दलका तथा स्वतन्त्र उम्मेद्वारी दिनेहरूले भने आज नै उम्मेद्वारी दिएका छन् । काठमाडौं महानगरको मेयर पदमा अहिलेसम्म १६ जनाको उम्मेदवारी परेको छ । निर्वाचन आयोगका अनुसार पहिलो दिन साना राजनीतिक दल र स्वतन्त्र गरी १६ जनाको मेयर पदमा उम्मेदवारी परेको हो । त्यस्तै उपमेयर पदमा ८ जनाको उम्मेदवारी परेको छ । अन्य जिल्लाहरूमा पनि थोरै मात्रै सङ्ख्यामा उम्मेद्वारी परेको तथा तथ्याङ्क सङ्कलनको काम भइरहेको आयोगले जनाएको छ ।