एजेन्सी ।। रुसले आक्रमण गरेदेखि अहिलेसम्म ६ लाख ६० हजारभन्दा धेरैले युक्रेन छाडेका छन् । संयुक्त राष्ट्रसंघीय शरणार्थी नियोगले अहिलेसम्म युक्रेन छाड्नेमा अधिकांश महिला र बालबालिका रहेका जनाएको छ । युक्रेनका राष्ट्रपति भोलोडिमिर जेलेन्स्कीले रुसले, युक्रेनी बालबालिकालाई निशाना बनाएको बताउनुभएको छ । युरोपेली संसदको विशेष सत्रमा सम्बोधन गर्दै जेलेन्स्कीले रुसले, युक्रेनी बालबालिकालाई निशाना बनाएको भन्दै आफ्नो भूमि र स्वतन्त्रताका लागि लडिरहने बताउनुभयो । यसैबीच रुसले युक्रेनको राजधानी किभमा रहेको एउटा टिभी टावरमा आक्रमण गरेको छ । रुसको ७५ प्रतिशत सेना युक्रेन पुगिसकेका एक जानकारलाई उदृत गर्दै बीबीसीले लेखेको छ । विश्व बैंक र अन्तर्राष्ट्रिय मुद्रा कोषले युक्रेनमा वित्तीय सहायता दिने तयारी गरिरहेको छ । विश्व बैंकले तीन अर्ब डलर सहयोग गर्ने र त्यसमा ३५ करोड डलर आउँदो हप्ता नै पठाउने जनाएको छ ।
