नुवाकोटमा ७ हजार नयाँ मतदाता थपिए

नुवाकोट ।। नुवाकोटमा ७ हजार नयाँ मतदाता थपिएका छन् । जिल्लामा भएको मतदाता नामावली सङ्कलन अभियानमा ७ हजार नयाँ मतदाता थपिएको जिल्ला निर्वाचन कार्यालय नुवकोटले जनाएको छ । जिल्ला निर्वाचन कार्यालयले गत मङ्सिर १७ गतेदेखि पुस ८ गतेसम्म जिल्लाभर मतदाता नामावली सङ्कलन अभियान चलाएको थियो । कार्यालयले दुई चरणमा गरेर जिल्लाको ११ वटा स्थानीय तहहरूको केन्द्रमा मतदाता नामावली सङ्कलन गरेको थियो । विदुर नगरपालिकाको हकमा जिल्ला निर्वाचन कार्यालय र जिल्ला प्रशासन कार्यालयमा नामावली संकलन निरन्तर रुपमा भइरहेकोबाट व्यवस्थापन गरिएको थियो । नामावली सङ्कलनको क्रममा ककनी गाउँपालिकाबाट ६ सय ८१, किस्पाङ गाउँपालिकाबाट तीन सय, तादी गाउँपालिकाबाट ८ सय १, तारकेश्वर गाउँपालिकाबाट २ सय ८८, दुप्चेश्वर गाउँपालिकाबाट ९ सय २ जना थपिएका छन् । यस्तै, पञ्चकन्या गाउँपालिकाबाट ६ सय ८१, बेलकोटगढी नगरपालिकाबाट ३ सय ५५, लिखु गाउँपालिकाबाट ५ सय ६०, शिवपुरी गाउँपालिकाबाट ४ सय ४३, सूर्यगढी गाउँपालिकाबाट ३ सय ८६ र म्यागङ गाउँपालिकाबाट ३ सय ८३ जना नयाँ मतदाता थपिएको जिल्ला निर्वाचन कार्यालय नुवाकोटले जनाएको छ ।