काठमाडाैं ।। इंग्लिस प्रिमियर लिग फुटबलमा टोटेनहम पराजित भएको छ । गएराति भएको खेलमा टोटेनहम सेफिल्ड युनाइटेडसँग ३–१ गोल अन्तरले पराजित भएको हो । घरेलु मैदानमा सेफिल्डलाई जित दिलाउन सन्डेर बेर्गे, माउसेट र ओलिभरले एक एक गोल गर्नुभयो । टोटेनहमका ह्यारी केनले एक गोल फर्काउनुभएको थियो । खेलको ३१ औं मिनेटमा सन्डेरले गोल गर्दै घरेलु टोलीलाई अग्रता दिलाउँदा ३३ औं मिनेटमा कप्तान केनले गोल गर्दै टोटेनहमलाई बराबरीमा ल्याएपनि रेफ्रीले त्यो गोललाई मान्यता दिएनन् । ६९ औं मिनेटमा माउसेटले गोल गर्दा सेफिल्ड २–० ले अघि रह्यो । ८४ औं मिनेटमा ओलिभरले गोल गर्दा घरेलु टिम ३–० ले अघि रह्यो । खेलको अन्तिम समयमा केनले एक गोल फर्काएपनि टोटेनहम ३–१ ले पराजित भयो । घरेलु मैदानमा जित निकालेसँगै सेफिल्ड लिगको सातौं स्थानमा उक्लिएको छ । सेफिल्डले ३२ खेलमा ४७ अंक जोडेको छ ।
