काठमाडाैं ।। नेकपा माओवादी केन्द्रको स्थायी कमिटी बैठक आज बस्दै छ । कोटेश्वरस्थित पार्टी कार्यालय पेरिसडाँडामा बस्ने बैठकमा देशको पछिल्लो राजनीतिक अवस्था तथा सत्ता सहकार्यका विषयमा छलफल हुने बताइएको छ । बैठक विशेषगरी प्रमुख प्रतिपक्षी दल काँग्रेसले सत्तामा जाने निर्णय गरेपछिको राजनीतिक अवस्थाबारे छलफलमा केन्द्रीत हुने नेता नारायणकाजी श्रेष्ठले बताउनुभयो । नेपाली काँग्रेसको शुक्रबार सम्पन्न केन्द्रीय कार्यसमिति बैठकले आफ्नै नेतृत्वमा सरकारमा जाने निर्णय गरेको थियो । आजको स्थायी कमिटी बैठकले प्रधानमन्त्री केपी शर्मा ओली नेतृत्वको सरकारलाई दिएको समर्थन फिर्ताकारे पनि निर्णय गर्न सक्ने श्रेष्ठले बताउनुभयो । गतबिहीबार सम्पन्न माओवादी केन्द्रको अनौपचारिक स्थायी कमिटी बैठकले केही दिनमै औपचारिक बैठक बोलाउने निर्णय गरेको थियो । सोही निर्णय अनुरुप बैठक बोलाइएको हो । बैठकले केन्द्रीय कमिटी बैठकका लागि एजेन्डासमेत तय गर्ने उहाँको भनाइ छ ।
