जनकपुर ।। मधेश प्रदेशका मुख्यमन्त्री लालबाबु राउतले नेपाली कांग्रेसबाट सरकारमा सहभागी मन्त्रीहरुलाई हटाउने तयारी गरेका छन् ।प्रधानमन्त्री शेरबहादुर देउवाले संघीय मन्त्रिपरिषदबाट जसपाका मन्त्रीहरुलाई बर्खास्त गरेपछि मुख्यमन्त्री राउतले मधेश सरकारको मन्त्रिपरिषदबाट कांग्रेसका मन्त्रीलाई हटाउन लागेको हुन् ।
मधेस प्रदेश सरकारमा कांग्रेसबाट भौतिक पूर्वाधार विकासमन्त्री रामसरोज यादव, खानेपानी तथा उर्जा विकासमन्त्री ओमप्रकाश शर्मा र महिला, बालबालिका, युवा तथा खेलकुदमन्त्री वीरेन्द्रप्रसाद सिंह छन् । उनीहरुलाई मुख्यमन्त्री राउतले फोनमार्फत राजीनामा दिन निर्देशन दिएको एक मन्त्रीले बताए । उनका अनुसार राजीनामा नदिए आजै उनीहरुलाई पदमुक्त गर्ने मुख्यमन्त्रीले तयारी गरेका छन् ।
जसपाबाट सहभागी मन्त्रीहरुलाई बिहीबार बर्खास्त गरिएको थियो । गठबन्धन छाडेर नेकपा एमालेसँग तालमेल गरेपछि जसपाका मन्त्रीहरुलाई हटाउने निर्णय गरिएको थियो ।
