गुल्मीमा पहिरोले पुरिएर एकै घरका तीन जनाको मृत्यु

गुल्मीमा ।। गुल्मीमा गएराति अविरल वर्षासँगै गएको पहिरोमा पुरिएर एकै घरका तीन जनाको मृत्यु भएको छ । गुल्मीको रेसुङ्गा नगरपालिका ८ खानिगाउँका तीन दिदीबहीनी २१ वर्षका भावना परियार, १४ वर्षका गंगा परियार र १४ वर्षका जमुना परियारको मृत्यु भएको जिल्ला प्रहरी कार्यालय गुल्मीका प्रहरी नायव उपरीक्षक डीएसपी पुरुषोत्तमप्रसाद पाण्डेले जानकारी दिनुभयो । माथिबाट आएको पहिरोले घर पुरिएपछि बीचको कोठामा सुतेका तीन दिदीबहिनीको मृत्यु भएको डीएसपी पाण्डेले बताउनुभयो । स्थानीय तिलक परियारको ६ जनाको परिवारमा तीन जनाको मृत्यु भएको छ । उहाँका श्रीमती र एक छोरी भने सकुशल रहेको प्रहरीले जनाएको छ । स्थानीयवासी, नेपाली सेना र नेपाल प्रहरीको सहयोगमा तीन जनाकै शव बिहान निकालेर गुल्मी अस्पताल तम्घास पठाइएको प्रहरीले जनाएको छ ।