काठमाडौं ।। नागरिक उन्मुक्ति पार्टीकी अध्यक्ष रञ्जिता श्रेष्ठले फेसबुकमा भावुक स्टाटस लेखेकी छन् । पार्टीका संरक्षक तथा उनका श्रीमान रेशमलाल चौधरीले अर्को दल दर्ता गर्ने हल्लापछि उनले फेसबुकमा स्टाटस लेखेर राजनीतिमा दूरी ल्याए पनि सम्बन्धको आत्मीयता कहिले नमेटिने बताएकी छन्।
‘मुटु ,यो फोटो ठीक छ’ भन्ने आवाज आज पनि कानमा गुन्जिरहेछ। राजनीतिले दूरी ल्यायो होला, तर सम्बन्धको आत्मियता कहिल्यै मेटिँदैन’, उनले भनेकी छन् ।
बिहीबार चौधरीसहितका नेताहरू नयाँ दल दर्ता गर्न निर्वाचन आयोगमा पुगेका छन् । विगत एक वर्षदेखि रेशम र रञ्जिताबीच पार्टीमा विवाद हुँदा अहिले पार्टी नै विभाजनको अवस्थामा पुगेको हो ।
यस बीचमा जनमत पार्टीसँग एकता गर्ने भनिए पनि केही विवादका कारण त्यो पनि हुन सकेको छैन । रञ्जिता रेशमकी पहिलो पत्नी हुन् भने दोस्रो पत्नी आशा चौधरी हुन् ।
