काठमाडाैं ।। नेपालमा कोरोना महामारीको तेस्रो लहर सुरु भएदेखि हालसम्मकै धेरै मानिसहरूमा सङ्क्रमण पुष्टि हुन थालेको छ । दैनिक सरदर १० हजार सङ्क्रमित थपिँदा सक्रिय सङ्क्रमितको सङ्ख्या पनि ९० हजार नाघिसकेको छ । कोरोना सम्बन्धी जानकारी दिने क्रममा इपिडिमियोलोजी तथा रोग नियन्त्रण महाशाखाका प्रमुख डा.कृष्ण प्रसाद पौडेलले पछिल्लो समय एक सय जनाको परीक्षण गर्दा ४० जनामा सङ्क्रमण पुष्टि हुन थालेको बताउनुभयो । उहाँले नेपालमा सङ्क्रमणदर बढ्दै गर्दा अस्पताल भर्ना हुने र मृत्यु हुने दर कम रहेको पनि जानकारी दिनुभयो । यसैबीच, सरकारले विभिन्न मुलुकबाट ल्याएको कोरोनाविरुद्धको खोप पालैपालो विभिन्न उमेर समूहलाई लगाउने भएको छ । चैत मसान्तसम्म सबै नागरिकलाई खोप लगाइसक्ने लक्ष्यसहित सरकारले पछिल्लो समय अनुदान र आफै खरिद गरेर खोप ल्याउने कामलाई तीव्रता दिएको छ । स्वास्थ्य सेवा विभाग अन्तर्गतको आपूर्ति शाखा प्रमुख सुरेन्द्र चौरसियाले आवश्यकताका आधारमा खोपहरू विभिन्न उमेर समूहलाई लगाइने बताउनुभयो । हिजो मात्रै फ्रान्स र इटालीले कोभ्याक्समार्फत् कोरोनाविरुद्धको १३ लाख मात्रा एस्ट्राजेनेका खोप नेपापललाई उपलब्ध गराएको छ ।
