नुवाकोट ।। रसुवामा १२ औं राष्ट्रिय जनगणनाको तयारी सुरु भएको छ । चैत १ गतेदेखि सञ्चालनमा आएको जिल्ला जनगणना कार्यालयले आवश्यक तयारी सुरु गरेको हो । कार्यालयले हालसम्म कार्यालय व्यवस्थापन तथा सरोकारवालासँग छलफल कार्यक्रम सञ्चालन गरेको छ । यसपटकको जनगणनाका लागि पाँच वटा गाउँपालिका रहेको रसुवामा ७८ गणक र २१ सुपरीवेक्षक परिचालन हुनेछन् । रसुवामा परिचालन हुने गणक तथा सुपरीवेक्षकले प्रत्येक घरमा पुगेर फारम भर्ने छन् । कार्यलय प्रमुख कपिल धितालले सुपरीवेक्षकहरूलाई आगामी वैशाख १६ देखि २२ गतेसम्म तालिम प्रदान गरिने बताउनुभयो । वैशाख २६ देखि जेठ १४ सम्म घरपरिवार सूचीकरण कार्य गरिने र जेठ १७ देखि २२ सम्म गणकहरूलाई तालिम प्रदान गरिने तथा जेठ २५ देखि असार ८ गतेसम्म गणना कार्य हुने पनि उहाँले जानकारी दिनुभयो । २०७८ भदौ १ देखि सङ्कलित जनगणनाको तथ्याङ्क प्रशोधन कार्य हुने छ । आगामी असोज मसान्तसम्ममा प्रारम्भिक नतिजा सार्वजनिक गर्ने र २०७९ वैशाखमा अन्तिम नतिजा सार्वजनिक गरिने छ ।
