रौतहट ।। रौतहट जिल्लाको यमुनामाइ गाउपालिकाका वडा नम्बर ४ का वडा अध्यक्ष र वडा सचिवले गरेको गलत सिफारिशका कारण एक जना अपांग व्यक्ति ३ वर्ष देखि नेपाल सरकारबाट पाउने सेवा सुविधाबाट बन्चित भएका छन् ।
मानसिक रुपमा अपांग भएको छोराको अपांगता परिचय पत्र बनाउनका लागि सिफारिश गराउन गएका स्थानीय इजराइल मिया कवारीको छोरा युसुफ मियाको वडा अध्यक्ष अश्वनी यादव र सचिव सन्तोष सिंहले लापरवाही पुर्वक गरिदिएको सिफारिसको कारण अहिले सम्म सेवा सुविधाबाट बन्चित भएको हो ।
२०७४ साल मङ्सिर १ गतेमा सिफारिश गरे पनि अहिले सम्म अपांगता परिचय पत्र नबनेको पिडितले गुनासो गरेका छन् । निरक्षर रहेका मियाको हैरानी गर्ने तथा सेवा सुविधाबाट बन्चित गर्ने उदेश्यले जानी जानी गलत सिफारिश गरेको वडा अध्यक्ष र सचिवको कारण पाउनु पर्ने भत्ताबाट बन्चित भएकोले क्षतिपूर्ति दिलाई दिन सम्वन्धित कार्यालयबाट पिडितले माग समेत गरेको छ ।
अपांगता परिचय पत्र स्थानीय तहबाट जारी हुने जान्दा जान्दै पनि वडा सचिव सिंह र वडा अध्यक्ष यादवले नेपाल विधुत प्राधिकरण कार्यालय गौर रौतहटको नाउमा गरेको सिफारिशको कारण सेवाग्राही करिव साढे तिन वर्ष देखि भौतारिदै आएको छ । मानसिक रुपमा रहेको छोराको सिफारिश गराउन जादा वडा अध्यक्ष र सचिवले यस्तो गलत सिफारिस गरेको पिडितले बताए ।
प्रमुख जिल्ला अधिकारी इन्द्रदेव यादवले जानी जानी दुख दिने तथा सरकारी सेवा सुविधाबाट बन्चित गर्ने कार्य गर्ने माथि कानुनी कार्यवाही हुने बताउनु भएको छ ।
