मोरङ ।। विराटनगर महानगरपालिका- ५ का रोहित चौधरी हत्याकाण्डमा थप दुई जनालाई प्रहरीले पक्राउ गरेको छ।
जिल्ला प्रहरी कार्यालय सुनसरीका प्रमुख प्रहरी उपरीक्षक प्रभु ढकालका अनुसार हत्याकाण्डको अनुसन्धानका क्रममा बिहीबार धरान र विराटनगरबाट उनीहरूलाई पक्राउ गरिएको हो।
प्रहरी उपरीक्षक ढकालले पक्राउ पर्नेमा धरानका प्रकाश लिम्बू र विराटनगरका अज्जु भनिने अजय शर्मा रहेको जानकारी दिए। शर्माले हतियार उपलब्ध गराएको प्रहरीको प्रारम्भिक अनुसन्धानमा देखिएको उनले बताए। चौधरी हत्याकाण्डमा प्रहरीले बुधबार नाइके मानिएको लेटाङ नगरपालिका- १ का दीपक तिमल्सिना र धरान- १४ का अनसन तामाङलाई पक्राउ गरी सार्वजनिक गरेको थियो।
त्यससँगै थप अनुसन्धानका क्रममा करिब २२ वर्षका लिम्बूलाई धरान र करिब ३० वर्षका शर्मालाई विराटनगरबाट पक्राउ गरिएको ढकालले जानकारी दिए। उनका अनुसार घटनामा तिमल्सिनालगायतको समुहलाई शर्माले हतियार उपलब्ध गराएका हुन्।
घटनामा तीन जनाको संलग्न रहेको प्रारम्भिक अनुसन्धानमा खुलेसँगै हत्याप्रकरणमा जोडिएका अन्यको पक्राउमा प्रहरी खटिएको छ। प्रहरीले हतियार उपलब्ध गराएका सप्लायर शर्मासँग थप अनुसन्धान गरिरहेको छ।
गत साउन ५ गते २८ औँ जन्मदिन मनाउन विराटनगरबाट भेडेटार, मुलघाट हुँदै विराटनगरस्थित घर फर्कने क्रममा धरानको सेउती पुलनजिक चौधरीमाथि लुटेराहरुले आक्रमण गरेका थिए।
लामोबाटो मोटरसाइकलमा सवार चौधरी र उनको साथमा रहेकी युवती पानी खाने क्रममा पुलबाट उत्तरतर्फ जंगलमा रोकिएका थिए। सोही क्रममा लुटेराहरुले युवतीले लगाएको सिक्री र चौधरीसँग रहेको मोबाईल र पैसा लुटेका थिए। यसक्रममा चौधरीले प्रतिकार गर्ने क्रममा घटनाका मुख्य नाइके तिम्सिनाले गोली प्रहार गरेको प्रहरीले जनाएको छ। गोली लागेर घाइते भएका चौधरीको उपचारका क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको थियो।
पक्राउ परेका तिम्सिना, तामाङसँग यसअघि पनि मोरङ लेटाङदेखि पश्चिम चतराको जंगलमा विभिन्न चारवटा अपराधिक घटनामा संलग्न रहेको खुलेको छ। सो समूहको यो चौँथो अपराधिक घटना भएको प्रहरीले जनाएको छ।
पक्राउ परेका तिम्सिना जबरजस्ती करणी मुद्धामा १० वर्ष कैद भुक्तान गरि दुई महिनाअघि छुटेका हुन्।
त्यसैगरी, तामाङ लागु औषध मुद्धामा ६ महिना कैद भुक्तान गरि २ वर्षअघि छुटेका अभियुक्त हुन्। स्राेत – देश सञ्चार
